ឆ្នាំ២០១៩ បានរំកិលកន្លងបាត់ទៅ តែបន្សល់នៅរឿងជាច្រើនសម្រាប់ ឆ្នាំបន្ទាប់!
ស្ថានភាពនយោបាយ
វានៅតែមិនល្អប្រសើរ អវត្តមានគណបក្សប្រឆាំងដ៏ធំនៅក្នុងប្រទេសកម្ពុជា ក្នុងរយៈពេលជាង២ ទស្សវត្ស មិនធ្លាប់មាននៅក្នុងនយោបាយសម័យទំនើបរបស់កម្ពុជា។ មេដឹកនាំគណបក្ស ប្រឆាំង មួយរូបសំងំនៅក្រៅប្រទេស ដោយមិនទាន់អាចវិលត្រលប់ចូលក្នុងប្រទេសបាន រី៑ឯមួយរូបទៀតកំពុងតែនៅក្នុងប្រទេសតែបាត់បង់សិទ្ធិចូលរួមសកម្មភាពនយោបាយ និងធ្វើនយោបាយ និងឡើងតុលាការឆាប់ៗនេះ។
កម្ពុជាមួយដែលដើរលើ ផ្លូវ ប្រជាធិបតេយ្យ តែក៏ធ្វើខ្លួនមិនតាមអ្វីដែលខ្លួនថាប្រកាន់ខ្ជាប់។ ស្រមោលនៃការបែកបាក់ សាមគ្គីជាតិ នៅតែបន្តអន្ទងកម្ពុជា។ បើទោះបីសមិទ្ធិផលសន្តិភាព ដែលកំពុងនឹងមានរាល់ថ្ងនេះ កម្ពុជាក៏មិនទាន់មានក្តីសុខលើរបបនយោបាយ និងសន្តិសុខរបស់ប្រទេសនៅឡើយ។ កម្ពុជាមួយតែ មានចិត្តបី បួន ធ្វើអោយកម្ពុជាពិបាកដើរ។ កម្ពុជាដែលសល់នៅក្នុងប្រវត្តិសាស្ត្រ នូវភាពរុងរឿង និងថ្កុំថ្កើងរបស់ខ្លួន កំពុងប្រឈមរឿងមួយចំនួន នៅឆ្នាំ ២០២០ និងត្រូវការដំណោះស្រាយមួយដ៏ ត្រឹមត្រូវ និង ប្រកបដោយភាពឆ្លាតវ័យ។ កម្ពុជាអាចថានៅវ័យក្មេងគំនិត តែអ្នកនយោបាយដែលមានវ័យចាស់ទុំ ជាព្រឹទ្ធាចារ្យសម្រាប់អ្នកជំនាន់ក្រោយ គួរគិតត្រិះពិចារណា អោយបានវែងឆ្ងាយ។
អំណាចពិតជាសំខាន់ តែយើងក៏ត្រូវគិតពីការរស់នៅរបស់ប្រជាជន និងភាពខ្វះខាតរបស់ពួកគាត់។ កុំចាំតែប្រជាជនជួបបញ្ហា និងខាតបង់ ទើបធ្វើជាចេញមុខដោះស្រាយ។ អតីតសមាជិកគណបក្ស ប្រឆាំង នៅតែរក្សាផ្នត់គំនិតវាយប្រហារទំាងកម្រោល ខ្វះដំណោះស្រាយ និងភាពចាស់ទុំគំនិត។ ការ ចាក់អោយខឹង អោយស្អប់ ដោយខ្វះមូលដ្ឋាន ធ្វើអោយតែមានរឿងមិនចេះចប់។
ផ្នត់គំនិតអ្នកនយោបាយវ័យក្មេង របស់គណបក្សកាន់អំណាច នៅតែទទួលយកពីឪពុកម្តាយខ្លួន ដែលកំពុងតែកាន់អំណាច និងមានតំណែងសំខាន់នៅក្នុងគណបក្ស និងរដ្ឋាភិបាលបច្ចុប្បន្ន។ ម្យ៉ាងជីវិត របស់ពួកគេរស់បានសុខស្រួល និងសោយសុខលើទ្រព្យសម្បតិ្ត ដែលគ្រួសារពួកគេរកបានក្នុងរយៈពេលដែលកំពុងមានអំណាច បុណ្យសក្តិ។ នេះជាអ្វីដែលប្រជាជនទូទៅបានដឹង និងឃើញ។ វាមិនមែនជាការនិយាយបំផ្លើស ឬជាគំនិតអគតិអ្វីនោះទេ គ្រាន់តែចង់លើកឡើង ជាអ្វីដែលយើងរាល់គ្នាមានការបារម្ម និងគិត។
នយោបាយគួរតែលេងអោយប្រាកដ និងចេតនាល្អ កុំធ្វើឡើងដើម្បីចេតនាអាក្រក់ណាមួយ ដែល វាបង្ក ហានិភ័យដល់អ្នកគាំទ្រ និងប្រទេសជាតិទាំងមូល។ បើមួយៗនៅតែប្រឹងរកយុទ្ធសាស្ត្រ ដើម្បីកំទេច គ្នាទេ កម្ពុជាពិតជាមិនបានសុខទេ។
Noan Sereiboth 